U·IATTIMGIPAONI
SHILLONG: Meghalaya Early Childhood Development Mission (MECDM)-ko a·bachengatna siengahani gimin a·dokni dingtang block aro cluster level-rango kam ka·giparangko tarisamsona gita Bristibar saloni a·bachenge Training-ko Shillong songjinmani State Convention Centre-o ong·atenga.
Ia training module-ko MECDM-ni program manager-rang dakdilenga aro ia training program-ko dingtangmancha Cluster level master trainer-rangna ong·atenga.
Ia training program-ko ong·atanio Social Welfare department-ni Director aro MECDM-ni Deputy CEO CD Lyngwa, training-o bak ra·enggiparangna aganprakangengon, skulo poraienggipa bi·sarangko poraia dontongjana gita didina nangengani gimin aganangenba, bilsi sokgija an·o donganiko champenganio neng·nikanirangko chagrongna gita nangenga ine an·tangni jajrengchakaniko parakangaha.
“An·ching an·chingni bi·sarangko iandakgipa obostarango ga·akna on·na man·jawa, uni gimin iandakgipa kamrangoniko chel·chakaniara an·ching sakantini daitoan ong·enga,” ine Lyngwa aganaha.
Meghalaya a·doko ia Early Childhood Development Mission-ko a·bachengatahani gimin sorkariko mittelpilangengon, a·dokni Chief Minister Conrad K Sangma-ni dilanichi ia Mission-ko a·bachengataniara a·dokni manderangna pattiani gita ong·enga ine Lyngwa parakataha.
A·dokni namroro silroroanina bang·en kamrangko ka·enga ine ua dingtangmancha Health & Family Welfare Department-nii Principal Secretary Sampath Kumar-koba mittelpilangaha.
Ia Early Childhood Development Mission-ara a·song gimiko skanggipa changna Meghalaya sorkarini ra·gatgipa program ong·enga aro ia Mission-ko a·dok sorkari 2022 bilsio a·bachengatahachim.
