U·IATTIMGIPAONI
SHILLONG: National Education Policy (NEP) 2020-ko North Eastern Hill University (NEHU)-ni Vice Chancellor Prof PS Shukla, ia bilsionin ra·gatengahani gimin a·doko songdongenggipa manderangna ia NEP-ni bidingo talatanirangko on·na gita Meghalaya College Teachers Association (MCTA), da·al Sombar salni attam 4:00 bajio open press conference-ko Shillong Press Club-o ong·atenga.
Ia open press conference-ko ‘U Sangot: U Pyrta’ ingipa YouTube channel-o a·dokni manderangna live mesokatgen.
Ia press conference-ko ong·atani bidingo kobor ra·timgiparangna u·iatengon, Meghalaya a·doko ia bilsioni NEP-ko ra·gatanichi maidakgipa neng·nikanirangko chagrongna nangengachim aro mikkangchi maidake nangchakeanirangko man·gen, uarangni bidingo agan-talate on·anggen ine MCTA-ni general secretary Airpeace W Rani parakataha.
“Ia program-ara skie on·giparangna, chatro chatrirangna, ma·a paarangna aro dilgiparangnaba re·bae, an·chingni mikkangchina lekka porako namdapatanio on·gilpana gita namgipa chol ong·enga,” ine Rani aganaha.
NEP-ni bidingo a·dokni pilak manderangan ma·sie ra·na man·na gita ia press conference-ko YouTube-o live mesokatgen ineba MCTA-ni general secretary parakataha.
Rani-ni parakatani gitade, ia program-ko social media gita live mesokatanichi je manderangan, ia program-o dongpana sikgenchimoba dongpana gita man·jaengachim, uandakgipa manderangna bak ong·na gita namgipa chol ong·gen.
NEP-ni bidingo jinma chanchirimanio a·doko songdongenggipa mande sakantini ku·pattianirangan gamchatgipa ong·gen ineba ua aganaha.
