U·IATTIMGIPAONI
SHILLONG: Da·o September 15 tarikoni ong·atenggipa Meghalaya Legislative Assembly-ni Autumn session-ko bakkandike ong·atani gimin Opposition Congress suk ong·gijaniko parakaha.
Session-ko salbonganasan ong·ataianiara agre bakkandika aro iandakgipa bakkandikgipa somoio, manderangni neng·nikanirangko chanchirimna gita man·ja, maina chanchina nanggipa kamrang bang·en dongachim, Congress dilgipa aro Opposition chief whip Saleng Sangma aganaha.
“Manderangni neng·nikanirangko agan-chanchirimna gita Assembly-mangmangosan man·a aro ian an·chingni constituency-ni mangmangko ong·ja a·dok gimikni giminan chanchirimna gita man·a,” Sangma aganaha.
Job Reservation Policy, Sima arini mamla dakgiparang aro education-ni bidingoba namedake chanchina nanganirang donga, Session-ko komibeoba sal 15-20 de ong·atna nangachim, Congress dilgipa aganaha.
