SHILLONG: Dingtang dingtang biaprango mobile network-rangna neng·-nikanirangko man·engon Meghalaya a·dokni sko-tong songjinma Shillong-oba ia sal somoirango namen mobile network-rang namjabatanirangko chagrongna gita nangeng-aha. Aro ian skangna bate mobile network-rang namjabatengaha.
Guwahati-Shillong rama jolrango mongsongbate Ribhoi jolrango jio network-rang man·gijanichi manderangna namen neng·-nikanirangko on·engchim. Ua rama gita songreang-genchim ong·ode manderang Jorabat aro Khanapara ramaona sokosa network-kon man·epilaiachim.
Batanggimin bang·gija sal somoirangna skangsan NGO-rang mitam Jio tower-rangko manderangni nangnikani gita chu·onge network-ko on·na man·jani gimin dongtongatani-rangkoba man·ahachim.
Niate nigenchim ong·ode Shillong songjinmaomangba mitam gittimrangode jio-ko jakkalenggipa mitam manderangde call ka·e nangana golpona mang-mangba man·jengachim.
Assam-ni Karni Anglong jolrangode manderang wifi jakkalna nanggijan bakrogipa ba bang·gipa file-rangko upload ka·na gita man·tokaiachim, indiba Shillong-ode ia indakgipa bakrogipa ba adita bang·gipa file-rangko upload ka·aniode wifi jakkaljaode mamingnan cholisrangjachim ine manderang matnangaha.