U·IATTIMGIPAONI
TURA: South Garo Hills a·jani Chokpot jolo donggipa Budugre songo ro·ong bikotaniko songni manderang jegaltokengon, ia biapo ro·ong quarry-ko chalaina gita quarry nokgipa, tol·gipa lekkarangko jakkalaha ine A·king Nokma aro uni chrarang, quarry nokgipani kosako FIR ka·doangaha.
FIR-ko Budugre A·kingni Nokma AR Sangma, Chokpot police station-o ka·aha aro uni FIR-o janapatani gitade, Morphine R Marak minggipa mandeni a·ana, ia quarry nokgipa Alpha D Marak, No Objection Certificate (NOC)-o aro Nokma Document-o tol·e soi ka·ahachim.
“Chingni RTI ka·e am·sandianio ma·sina man·ani gitade, bigha 36 ong·gipa a·ana aro NOC-o ua tol·e soi ka·aha maina chingade iana NOC-ko ba Nokma lekkarangko on·aba dongjachim. Ia lekkao ka·gipa soiara angni soi ong·ja aro seal-koba uamang scan ka·a gita nikenga. Ian chingni ma·sigijaniko chol ra·e chingko cha·bokna jotton ka·anisa ong·aha,” ine Budugre A·kingni Nokma parakataha.
Nokma-ni parakatani gitade, NOC-o soi ka·gipa mande, ia a·ani arirangkoba name ma·sigipa ong·jachimkon maina ia lekkao janapani gitade, ia lekkara Budugre A·king gimikkon man·goppilani gimin darang Nokmaba iandakgipa lekkao soi ka·na krajachim.
Quarry-ko chalaienggipa a·ani nokgipa Morphine R Marak-ba nokmani lekkao an·tangni a·ako bigha 36 ine a·kangenba, tol·e soi ka·aha ineba Nokma matnangataha.
“GHADC-ni on·gipa a·a pattana ua ia lekkachin dorgasto galaha. Ia manderangni iandake niamrangko pe·ani a·sel songni manderangsan ong·aigija, samtangtango ong·telaigiparang, matburingrang aro chiring chibisikrangba nangchakeaniko man·tokengaha. Uni gimin ia manderangni kosako ta·raken ja·kuko de·china chinga mol·molenga,” ine Budugra A·kingni Nokma, FIR-o parakataha.
