U·IATTIMGIPAONI
SHILLONG: Re·anggipa July jao Tura-ni Mini Secretariat-o Chief Minister-ni dingtang dingtang dolrang baksa tom·e agangrikengmiting somoio rang·gitik so·sojengjeng ong·atanio jak donggipa manderangko, bobil dolni manderang gita Unlawful Activities Prevention Act (UAPA)-ni ning·o rim·ahani gimin Mongolbar salo, Meghalaya Trinamool Congress (TMC)-ni dilgipa Mukul Sangma, a·dok sorkariko jegalataha.
Mongolbar salo, Assembly-ni Autumn Session-o adita salrangna skang, Thangskai songo Meghalaya Cements Limited-ni public hearing-ko ong·atanio police-rang nangana bate bilrangko jakkalaha ine VPP-ni MLA Brightstar Marbaniang-ni ra·bagipa chanchirimanio bakko ra·angpaengon, Tura-o so·sojengjeng ong·atgipa manderangni kosako UAPA-ko jakkalahani giminba Mukul, an·tangni suk ong·gijaniko parakataha.
Police-rangko an·tangtangni man·gnina jakkalsretaha ine sorkariko matnangatengon, “Meghalaya a·dokni itihaso changsaba iandake police-rangni bil jakkalanirangko nikna man·kujachim. Iandakgipa kamrangchi mai kattarangko an·ching a·dokni manderangna mesokna jotton ka·enga? Police-rangde skatang dake rona man·aiama inema?” ine Sangma sing·doataha.
“Tura-o so·sojengjeng ong·anina anga an·tangba namen suk ong·jaha aro ia obosta ong·ani ja·man sorkari aro police-rangni kamko nigenchimode ia pilakan uamangni chanchisamsoe dakani gitasa nikna man·gen,” ine TMC parliamentary party-ni dilgipa Mukul Sangma aganaha.
Ua somoio rim·ako man·gipa chadamberangara bilsi 19-20-mangsan ong·kuenggipa chadamberang ong·e poraienggiparangsa ong·achim ine janapatengon, poraienggipa chatro chatrirangko bobil dolni manderang gita UAPA-ni ning·o rim·aniara kraani ong·ama ine Sangma sing·doataha.
