U·IATTIMGIPAONI
SHILLONG: A·song gimikni 100 percent ong·gipa average-ko tosusagenchimode Meghalaya a·doko an·chi on·gilani 18 percent-san ong·e namen komibatenga ine Sombar salo, a·dokni Health Minister Ampareen Lyngdoh, Shillong songjinmani Nazareth Hospital-o National Voluntary Blood Donation Day-ko maniani somoio parakataha.
Meghalaya a·doko an·chi on·gilgiparang namen komiengani gimin an·tangni suk ong·gijaniko parakatengon, a·dokni nokdang ge·antionan aro kona noksik pilakonan Ayushman Bhav aro Sewa Pakhwada-ko gipatna man·na gita a·doko songdongenggipa pilak manderangkon re·bae an·tangtangni an·tangtangni gamchatgipa an·chirangko on·giltokchina Lyngdoh didiataha.
Manderangna nangan somoirango on·na man·na gita an·chirangko on·gilna nangchongmotenga ine janapatengon, ia sal somoirango dingtang dingtang an·chi on·gilgipa dolrangni an·chi on·gilanirangko a·dokni dingtang dingtang health centre-rango nangenga ine Health Minister parakataha.
Meghalaya a·doko bang·a manderangan an·chi on·gilanichi be·enrang bilgribatanggen ine bebera·kuengani gimin an·tangni suk ong·gijaniko parakatengon, iandakgipa jangbingbanganirangko bebera·jachina aro hospital-rangona re·bae an·tangtangni an·chirangko on·giletokchina gita Lyngdoh, a·doko songdongenggipa manderangko mol·molataha.
Ia tom·anio East Khasi Hills aro Ri Bhoi a·jaoni dol 45-na baten an·chi on·gilgipa dolrangna dingtangmancha mande ra·pilskaanikoba dakangaha.