U·IATTIMGIPAONI
SHILLONG: Meghalaya a·doko dam 266 gital Anganwadi centre-rangko kulina aro dam 1266 Anganwadi mini centre-rangko main centre-ona ra·dona gita ma·mong sorkari ra·chakangaha.
Iani bidingo kobor ra·timgiparangna u·iatengon, wachi kari ra·gatangahaon kamrangko a·bachenggnok aro ia kamna ma·mong sorkari 90 percent-ko aro a·dok sorkari 10 percent-ko chamgen ine Sukrobar salo, a·dokni Social Welfare Minister Paul Lyngdoh parakataha.
Ra·doatako man·gipa Anganwadi centre-rango da·ode kam ka·gipa (worker) sakgni aro dakchake on·gipa (helper) sakgni donggnok ine janapatengon, kam ka·giparangna dormahako japrako gong 3,500-oni gong 4,500/-ona bariatgnok ine Social Welfare Minister parakataha.
Lyngdoh-ni parakatani gitade, ia chu·gimik kamrangna nangenggipa korosara gong lak 826.38 ong·enga aro ianoni gong lak 743.74-kode ma·mong sorkari on·gen.
Gital kulina sienggipa dam 266 Anganwadi centre-rangni gimin janapatengon, ia gital centre-rangko kulianio sak 266 Anganwadi worker-rang aro sak 266 helper-rangko seokaniba bak ong·gen ine Social Welfare Minister parakataha.
