U·IATTIMGIPAONI
SHILLONG: Meghalaya a·dokni primary aro upper primary skulrango bi·sarangko biming segata komiengani gimin Education Ministry jajrengchakaniko parakataha.
Iani bidingo kobor ra·timgiparang janapatengon, Education Ministry-ni report-o pangchake, a·dokni dam 168 primari skulrango bi·sarangko biming segatani sak 10-na bate komibatenga aro dam 101 upper primary skulrangoba bi·sarangko biming segatani namen komienga ine Sombar salo, a·dokni Education Minister Rakkam A Sangma parakataha.
Ian a·dokna namen jajrengna nangani ong·enga ine janapatengon, ia skulrangko chipatanichide maming cholrangko ra·bana man·jawa maina Education Ministry-ni report-ko nienba maini a·sel bi·sarangko biming segatani komibatenga uko a·dok sorkari sandichengna nanggen ine Education Minister parakataha.
“Ian a·dokna jajrengna nangani aro angnaba ra·biani ong·enga,” ine Sangma aganaha.
Education Minister-ni parakatani gitade, Meghalaya a·doko mitam skulrangde chugipa a·brirangosa ong·e kilometer 5-oni 10-mang chel·grika aro iani a·selba mitam bi·sarang re·ruraanirango neng·nikanirangko man·e skulrangchi re·jaenga.
Mikkangchi ia skulrango bi·sarangni biming segataniko nambatatna gita Education department, nanga gita ja·kurangko de·anggen ineba Sangma parakataha.
Indake ong·engon, SSA skulrango skigiparangna sorkari, jagnini dormahako da·o antignini gisepon watatgnok ine Education Minister parakatenba, da·o dipet ma·mong sorkari skanggipa instalment-ko a·dokna watatkujaenga indiba ia tangka paisarangko bakan watatna ka·dongenga ine talataniko on·angaha.
SSA skulrango skigiparangna da·o October 16 tarikni gisepon jagittamni dormaharangko on·china gita dabie skigiparang, sorkarini kosako jingjengatna parakatmanahachim ine nikna man·a.
