U·IATTIMGIPAONI
Resubelpara: Meghalaya High Court-ni Chief Justice Sanjib Banerjee, Sonibar salo North Garo Hills District, Resulbelpara, Mendipathar-o gital District & Session Court building-ko nokdonggae on·angaha.
North Garo Hills, gital District & Sessions Court building-ko man·e dal·bea chu·sokaniko man·aha, ian jolni manderangna namgni ong·gnok. Niatgenchimode district-o judiciary-ko executive-oniko bilsi 2020 September jani 20 tarikon dingtangataha ba ma·ekataha.
Chief Justice, gital building-ni plaque-ko oprakataon chonchongipa bi·sarangko okamaha aro ‘ia bi·sarangan mikkangchi justice delivery institution-o kam ka·nagiparang’ ine aganaha.
Uandake court-ni gamchatani gimin parakatangaon, Chief Justice Banerjee, ‘court-ni mongsonggipa kamara ba daitoara citizen ba manderangni bilko chelchak-naljoke rakkianian ong·a aro pilak manderangnan darangkoba mikkang nigija kakket bichal ka·e on·nanian court-ni daito ong·a.
A·song aro a·dokoni tang·doanio namroro-silroroanio me·chikrangni on·gilani bang·bea, uni gimin an·ching me·chikrangna gimik kam ka·ani a·baon apsangrikgipa cholrangko on·na nanga ineba Chief Justice Sanjib Banerjee, aganaha.
Iarangni gisepon Mr Banerjee, ma·mong aro a·dok sorkariko North Garo Hills district-o gital court-ni building-ko rikna tangka paisani gita dakchakaniko on·nani gimin mittelataha. Aro je nitogipa biapo gital buildingko rikaha, ua biapni nitoaniko rakkiangna ba buring-bolgrimko mikkangchi chadamberangna ripingna didiangaha. Unbaksana chief justice, manderangko court-ona re·e, uamangni neng·nikarangna dakchakaniko ra·china mol·molangaha.
Law-ni Minister Dr M. Ampareen Lyngdoh-ba programo bakko ra·angaha aro chief justice-ni a·dokni noksik-nokbakona justice system-ko sokatna kam ka·aniko de·mittelangaha.
Ia gital buildingko rikna gita kror 19.43-ko koros ka·aha, jeoni 90 percent fund ba tangkako ma·mong sorkari on·aha. Central sponsored scheme-ni gita dingtang dingtang additional fund ba tangkarangko judicial infrastructure project-na jakkalaha ine Minister Lyngdoh aganaha.
Iana skang Dr Ampareen Lyngdoh, Dainadubi-ni Lay By Parket, Sarangma aro Sambrak-ona re·ange project-ni kamrangko nirokeaha.
Meghalaya High Court-ni judge W. Diengdoh-ba programo bakko ra·e aganprakataon, PWD, PHE, Power Department aro gipin dingtang dingtang daitoko jako ra·e kam kag·ipa department-ni official-rangko project-ni chu·sokanina nama sikaniko on·aha.
Kharkutta-ni MLA Rupert Momin aro Mendipathar-ni MLA, Marthon J Sangma- uamangba programo bakkko ra·angaha aro gital court buildingko rikna a·ako on·anina Mendipathar College Governing Body-ko mittelataha.
