U·IATTIMGIPAONI
TURA: Tura Diocese-ni bilsi 50 gapaniko re·baenggipa November jani 4 aro 5 tarikrango Tura Don Bosco Higher Secondary School kal·chakramo dal·bee maniangna sienga aro iana da·o kamrangko ka·chichasotokengaha.
November-ni 4 tariko, Shillong Diocese-ni Archbishop Most Reverend Victor Lyngdoh, Tura-ni Sacred Heart Shrine-o Adoration Chapel-ko dilanggen aro November-ni 5 tariko Northeast India Bishops’ Council-ni Chairman Most Reverend John Moolachira, Holy Mass-ko dakdilangskagen.
Robibar salo, Meghalaya a·dokni Chief Minister Conrad K Sangma-ba Jubilee Mass-o dongpae bak ra·anggen.
Tura Diocese-ni bilsi 50 gapaniko maniani bak gita dingtang dingtang parish-rangna bilsi gittamna kingking dingtang dingtang program-rangko tarisamsoahachim indiba COVID-19 sajinmani a·sel ia program-rangko ong·atna man·jahani gimin Golden Jubilee Year-ko re·aggipa 2022 bilsini April 23 tariko Tura-ni Walbakgre Parish-o a·bachengatskaaha.
Golden Jubilee Year-ko a·bachengataonin dingtang dingtang biaprango Catholic bebera·giparangna dingtang dingtang program-rang, jekai seminar, symposium aro uandakgipa program-rangko ong·atangaha.
Tura Diocese-ni bilsi 50 gapani bidingo talate on·angengon, Tura Diocese-ko 1973 bilsio a·bachengatani somoio ia Diocese-ni ning·o parish ge·doksan dongaiachim aro ia parish ge·dokni ning·o sak 40,000-mangni gitasan Catholic bebera·giparang dongaiachim indiba da·o Tura Diocese-ni ning·o ge 46 parish-rang dongaha aro ia parish-rangni ning·o sak lak 3.40-mangni gita bebera·giparang dongaha ine Catholic pamongrang parakataha.
Tura Diocese-ni bilsi 50 gapanio bang·bea skul aro college-rangkoba kuliaha aro iachin A·chik a·songni manderangna a·gilsakni seng·ani baksana an·seng baljokanirangkoba on·na man·aha ine u·iataha.
Tura-o songdongchenganggipa skanggipa Catholic Missionary-rangara, Reverend Father A Pinazzy SDB aro L Rocca SDB ong·achim aro uamang 1933 bilsimangon Tura-ona re·bae songdongahachim ine Catholic dilgiparang kobor on·aha.
