U·IATTIMGIPAONI
SHILLONG: Re·baenggipa 2024 bilsio ong·atna sienggipa Lok Sabha election-o Congress dol, Meghalaya a·dokni Shillong aro Tura Parliamentary seat damgnikon chegen ine AICC-ni secretary Meghalaya in-charge Manish Chatrath, an·tangni ka·dongchakenganiko parakataha.
Iani bidingo kobor ra·timgipa manderang baksa agangrikengon, NPP-chi dilenggipa MDA sorkari, bilona re·bapilani ja·manoba an·tangtangni ku·rachakako chu·sokatna man·jaha ine Chatrath, Bristibar salo aganaha.
Batanggimin changoba ia sorkari, Meghalaya a·dokna maming kamrangkon chu·sokate on·na man·jaha ineba ua aganaha.
“Uni gimin manderang da·o NPP-chi dilenggipa MDA sorkarini miksonganirangko ma·sina a·bachengengaha. Meghalaya a·doko chadamberang bang·an kamrangko man·gija dongna nangtokenga aro re·baenggipa bilsini Lok Sabha election-ode chinga a·dokni seat damgnikon chena ka·dongenga,” ine AICC-ni secretary parakataha.
Election ong·oba ong·jaoba Congress dol pangnan an·tangtangko tarie dongronga ineba ua aganaha.
Re·baenggipa bilsini Lok Sabha election-o Khasi aro Garo Hills damgnion kamrangko ka·sona gita uamango dilgiparang bang·en donga ineba Chatrath aganaha.
Uni aganani gitade, Shillong aro Tura Parliamentary seat damgnion Congress-ni tikitna dorgasto galgipa manderang bang·enga.
“Indake ong·genchimoba candidate-rangkode Delhi-o donggipa screening committee-sa nipilanggen ar ja·mano ia candidate-rang chena chol dongama dongja uko nina gita Central Election Committee-ona watatkugen,” ine Chatrath aganaha.
