U·IATTIMGIPAONI
SHILLONG: Wachi kari ra·gate da·o a·ran kari sokbaahani gimin a·dokni dingtang dingtang biaprango nosto ong·e dongenggipa ramarangko tarichina gita a·dok sorkari, PWD (Roads)-na ge·etaniko on·angaha.
A·dokni Deputy Chief Minister Prestone Tynsong-ni parakatani gitade, a·ran karini somoirango ramarangko name rakkina man·na gita sorkari, PWD (Roads)-ni commissioner secretary, secretary aro chief engineer-rangna ge·etaniko on·atmanaha.
Nosto ong·e dongenggipa National Highway (NH-6) ramako tarichipkujaengani gimin adita salrangna skangsan, a·dok sorkari aro National Highways Authority of India (NHAI)-ko jegale, Jaintia Hills a·jani Khasi Students Association (KSA) jingjengatanirangko dakangahachim ine nikna man·a. Antisana garirangko saljachina gitaba uamang, pilak gari nokgiparangkon didiatahachim.
Jingjengatengmiting somoio KSA-ni mitam membor-rang Khliehriat ramao tusie jingjengattokaha aro mitamranga a·kolrara dakgipa ramarangko na·tok jilgipa pokkri aro mi a·palrang gita tarie jingjengatskaahachim.
Dalu-oni Garobadha-ona dakanggipa km 100-ni ramaba da·o a·kolrara dake nosto ong·aniko nikna ma·engahachim. Walantian ia rama gita Bangladesh a·songona ro·ong salruraenggipa ritchani ritcha truck garirang re·rurae ia rama nosto ong·atako man·ahachim.
Lad Mawrang-oni Rambrai bazar-ona dakanggipa ramaba Rambrai Nongbah-ona kingkingan obosta namsrangjahani gimin adita salrangna skangsan FKJGP Rambrai circle, suk ong·gijaniko parakatahachim.
Iani bidingo FKJGP-ni gita RTI ka·e am·sandion, ia km 2.5 ong·gipa ramako metaling ka·e black topping on·na gita sorkari, gong 2,24,95,200 tangkarangko chame on·aha ine ma·sina man·ahachim.
Ia ramako tarina gita 2023 bilsini April jaon joltangni sak 10 contractor-rangna kamko pakwatmanahaoba da·onan kamrangko a·bachengkujaenga ine FKJGP matnangataha.