U·IATTIMGIPAONI
SHILLONG: Meghalaya a·doko skigiparangni dormaharangko bariatchina dabianiko chu·sokatanide tangka paisarang dongaosa pangchakaigen ine a·dokni Education Minister Rakkam A Sangma parakataha.
“Skigiparangni nangnikanirangko anga an·tangba chu·sokatna nangnikengachim indiba a·dok sorkario chu·onga gita tangka paisarang dongkujani a·sel chu·sokatna man·kujaenga. Skigiparangni dormaharangko bariatanide a·doko tangka paisarang donga dongjaosa pangchakaigen,” ine Sangma aganaha.
Skigiparangan sorkarina mongsongbatgipa bak ong·enga aro uamangna sorkari man·a dipet dakchakanirangko on·na jotton ka·gen ineba ua aganaha.
Elementary-oni higher education gadangona a·doko sak 55,000-na baten skigiparang donga ine janapatengon, dingtang dingtang gadangni skigiparang dingtang dingtang dabianirang donga, jekai kamko regularize ka·ani, deficit gadangona ra·doani, adhoc grant aro gipinrang ong·a ine Education Minister parakataha.
“Chinga badiaba gadango skigiparangni dabianiko niatgenchimode gipin gadangni skigiparangba dingtang dabianirangko ra·baskaronga, uni gimin chinga pilakkon nina nangao ga·aka. Indiba chinga man·a dipet skigiparangni nangnikanirangko chu·sokatna jotton ka·gen,” ine Sangma aganaha.
Education Minister-ni parakatani gitade, a·doko sak 12,000 SSA skigiparang, kamtangtangko regularize ka·china dabitokenga aro Adhoc grant-o skigiparangba deficit gadangko dabitokengon, deficit skigiparangba provincialisation-na dabiskaengachim.
Finland a·songo manderang, skigiparango ka·dongani gimin a·gilsako lekka porako on·ani nambatgipa ong·enga ine toe janapatengon, “Skigipa sakantian an·tangtangni kamko name ka·genchimode adita bilsirangni gisepon, Meghalaya a·dokba lekka porako on·anio nambatgipa ong·gen aro iana chinga rakbee kamko ka·enga,” ine Sangma parakataha.
Skigiparangko name kam ka·china gitaba Education Minister didiataha.
