U·IATTIMGIPAONI
SHILLONG: National Cadet Corps (NCC)-ni bilsi 75 gapaniko maniani bak gita NCC North Eastern Region Directorate-ni ong·atenggipa car rally-ko Sombar salo, a·dokni Chief Minister Conrad K Sangma, a·bachengate on·angaha.
Ia car rally-ko Special Outreach Program-ni bak gita ong·atenga aro ia car rally-ko November-ni 26 tariko Guwahati songjinmao matchotatenga.
Ia car rally-ko a·bachengate on·anganio a·dokni Chief Minister, jinmana aganprakatengon, a·songko rikanio NCC-ni on·gilanirangna mittelpilangenba, ia car rally-ko ong·atanichi chadamberang, dingtang dingtang biaprango songdongenggipa manderangkoba grongna cholrangko man·gen ine parakataha.
NCC-ni kamrango ua man·a dipet dakchakanirangko on·na gitaba Chief Minister, ku·rachakaniko on·angaha.
A·dok sorkarini ra·gatgipa dingtang dingtang program-rang, jekai Yess Meghalaya, Meghalaya Grassroots Program, aro uandakgipa program-rangni giminba ia tom·anio ua jinmana talate on·angjolaha.
Ia car rally-ko ong·atanio gimik damdok a·dokrango donggipa dam 44 a·jarangoni dam 277 skulrang aro dam 151 college-rang bakko ra·enga.
