U·IATTIMGIPAONI
SHILLONG: Meghalaya a·doko ASHA worker-rangni dormahako bariatchina dabianiko sorkari knachakna gisiko nangjaengani gimin sorkarini kosako jegale, dontonggija jingjengatanirangko dakna gita Meghalaya ASHA Workers Union tik ka·angaha.
ASHA worker-rangara village council-rangni nirokanio an·tangtang dangdike on·giparangsa ong·a aro ASHA-rangna batanggimin somoirango nanga gita man·gnirangko on·aha ine Sombar salo, a·dokni Health Minister Ampareen Lyngdoh-ni parakatani ja·man, ASHA worker-rang sorkarini kosako jingjengatanirangko dakna tik ka·angaha.
Iani bidingo kobor ra·timgiparangna talate on·angengon, ASHA-rangni dabianiko chu·sokate on·jaskal uamang dontonggija jingjengatanirangko dakna tik ka·aha ine ASHA Workers Union-ni president Marajune Myrsing parakataha.
Myrsing-ni aganani gitade, ASHA-rangni man·gniko japrako gong 2000-oniko gong 5000-ona bariatchina gitasa uamang dabiengachim indiba sorkari, uamangni dabianiko chu·sokatna sikjaengachim.
“Chingna japrako on·enggipa gong 2000/- dormahako gong 5000-ona bariatchinasa chinga dabiengachim indiba sorkari chingni dabianiko knachakjaengani gimin chinga dontonggija jingjengatna tik ka·aha. National Health Mission-onikoba chinga tik ka·gimin dormahakode man·jaenga indiba bang·a bang·ja man·gnirangkosan man·paenga,” ine Myrsing talataniko on·angaha.
Sorkari uamangko agangrikna okamode uamang agangrikna kusi ong·aigen ine janapatengon, ASHA-rang kam dontongatahaode manderangna sanna bananirangko on·ani aro dingtang dingtang kamrang, jekai birth aro death certificate-rangko on·anirangoba neng·nikanirangko chagrongna nanggen ine ASHA workers union-ni advisor Sonny Kharjana mikrakataniko on·angskaaha.
