U·IATTIMGIPAONI
SHILLONG: Meghalaya a·dokni primary aro upper primary skulrango enrolment rate ba bi·sarangko biming segatanirang namen komiengani gimin kakketko ma·sie ra·na gita a·dokni Education department, survey ka·na gita tik ka·angaha.
Education Ministry-ni see rakkianiko parakani gitade, dam 168 primary skulrango biming segatgipa bi·sarang sak 10-na baten komibata aro Upper primary skulrangba biming segatanio komigiparang dam 101-mangni gita skulrang dongachim.
“Ia skulrango maini a·sel bi·sarang komienga, uko tale ma·sie ra·na gita chinga dal·bee survey-ko ka·na sienga,” ine Sukrobar salo, Meghalaya a·dokni Education Minister Rakkam A Sangma parakataha.
Skulrango napchina gita chatro chatrirangko didianirang dongjaengani gimin sorkari skulrango biming segatanirang komiengakon ineba ua aganaha.
“Haida skulrango namgipa nokrang, skigiparang, asongchakanirang aro uandakgipa gipin cholrang dongjani a·selba ia ong·engakon. Ia pilakkon chinga ma·sie da·o skigiparangkoba skulrango chu·ongen donatna jotton ka·enga,” ine Education Minister aganaha.
Sorkarini see rakkianiko parakani gitade, dam 14,600-na batgipa skulrango gimik sak 9,54,938-na baten chatro chatrirang biming segataha aro ianoni sak 5,30,390-de dam 9,223 primary skulrango, sak 2,44,008 chatro chatrirangde dam 3529 upper primary skulrango, sak 1,17,496 chatro chatrirangde dam 1462 secondary skulrango aro sak 63,044 chatro chatrirangde dam 386 higher secondary skulrango biming segataha.
Meghalaya a·dokni dam 36 skulrangode biming segatgipa chatro chatrirang saksaba dongsrangja aro ianoni sam 22-de primary skulrang, dam 5-de upper primary skulrang, dam 8-de secondary skulrang aro dam 1-de higher secondary skul ong·a ineba sorkarini see rakkianio parakaha.