U·IATTIMGIPAONI
TURA: Jengjal-ni Baljek Airport-o ong·atenggipa 100 Drums Wangala maniani gnigipa sal, chong·motan mijal Sukrobar salo, Rugala maniani aro jatni ring·susaanirangko ong·atangaha aro ia gnigipa salo, West Garo Hills a·jani Deputy Commissioner Jagdish Chelani, mongsonggipa sokgipa ong·e bak ra·angskaaha.
Ia 100 Drums Wangala maniani gnigipa salo dingtangmancha songni nokni kamalrang, Rugala manianiko dakdilangaha aro uni ja·mano ia Wangala manianio bakko ra·enggipa pilak dolrangan apsan dam bol 100-ko doke Wangalangaha.
Ia gnigipa salo, Ajia Doroa aro pagitcham ma·gitchamrangni ring·anirangko ring·susaatanikoba nikangna gita man·aha.
A·chikrangni bebera·ani gita mi misi minman tetmano, pattigipa ra·rongipa Misi Saljong aro Ama Rokkime-na rugalchenggija aro kritchenggijade cha·mal ringmalja aro uandaken ia Wangala maniani gnigipa salo songni Kamalrang, pattigipa ra·rongipa Misi Saljong-na Rugala manianiko dakdilangaha.
Rugala maniani matchotani ja·man, manianiona re·bagipa manderangna chu bitchirangko songni nokni manderang kanaha.
Indake ong·engon, ia 100 Drums Wangala manianiko da·al Sonibar salo matchotatgnok aro ia salni bako, a·dokni Deputy Chief Minister Prestone Tynsong, mongsonggipa sokgipa ong·e bakko ra·anggen.
Ia bon·kamgipa salon, dol 10 Wangalgipa dolrangni jinma apsan dam bol 100-ko doke Wangalanikoba nikangna man·gen aro dingtang dingtang dolrangni gisepo Wangalsusaanikoba nikangna man·gen.
