U·IATTIMGIPAONI
SHILLONG: Re·baenggipa bilsini election-o Hill State People’s Democratic Party (HSPDP) baksa bakrimna tik ka·aniara Lok Sabha election-osan ong·aigen indiba district council election-ode doltangari susaaigen ine Sombar salo, United Democratic Party (UDP)-ni president Metbah Lyngdoh, talataniko on·angaha.
Re·baenggipa 2024 bilsio ong·atna sienggipa Lok Sabha election-o apsan candidate-ko susaatani bidingo aro nangrime kamrangko ka·ani bidingo adita salrangna skangsan UDP aro HSPDP dolni dilgiparang tom·e chanchirimangahachim ine nikna man·a.
UDP aro HSPDP dolrang nangrime Regional Democratic Alliance (RDA)-ko songahachim aro da·o dipet Lok Sabha election-na candidate-ko seokkujaengoba, apsan nangrime candidate saksako susaatna tik ka·ahachim.
Indake ong·engon, UDP aro HSPDP dolrangni gisepo bakrime kamrangko ka·aniara Lok Sabha election-ni somoiosan ong·aigen indiba KHADC aro JHADC election-ode doltangtang susaani cholrang dongaia ine UDP-ni president Metbah Lyngdoh talataniko on·angaha.
Lok Sabha election-na candidate-rangko seokani bidingo janapatengon, da·o dipet UDP aro HSPDP dolrang, candidate-rangko tik ka·a dongkuja indiba candidate-rangko seokna gita UDP-ni state election committee-na pakwatmanaha ine Lyngdoh parakataha.
Shillong Parliament seat-o susana gita HYC-ni gitcham president Robertjune Kharjahrin-ba adita salrangna skangsan UDP-o napangahachim ine nikna man·a.
Kharjahrin baksana Shillong Parliamentary seat-o UDP-ni tikitchi susana sikenggipa gipin candidate-ranga, A·dokni Cabinet Minister Paul Lyngdoh, UDP-ni general secretary Jemino Mawthoh, vice president PT Sawkmie, KHADC-ni gitcham CEM Titosstarwell Chyne aro Khasi Authors Society-ni president DRL Nonglait-ba ong·engachim.
Tura Parliamentary seat-na UDP-ni candidate-ko seokani bidingo janapatskaengon, Tura Lok Sabha seat-na candidate-ko seokna gita UDP-ni central executive committee, UDP-ni state election committee-ni pakwate on·aha maina ia committee-on core committee-ni membor-rang aro Garo Hills-ni dilgiparangba donga ine UDP-ni president parakataha.
