U·IATTIMGIPAONI
TURA: Tura-ni Te·teng A·ja gittimo donggipa bijoli krongrang namangjaengahani a·sel aro maramrang cha·engahani a·sel jolo songdongenggipa manderangna kenchakna nangani ong·enga ine Federation of Khasi, Jaintia & Garo People (FKJGP) Garo Hills Zone (GHZ) parakatenba, jolo songdongenggipa manderangni namgnina ia bijoli krongrangko ta·raken te·srechina gita Tura Hawakhana-o donggipa Meghalaya Energy Corporation Limited (MeECL)-ni Additional Chief Engineer-na sedoataha.
FKJGP-GHZ-ni president Pritam Arengh-ni u·iatani gitade, Te·teng A·jao donggipa bijoli krong ge·gnian bilakbegipa 11 KV bijoli silitingrangko kagipa krongrangsa ong·a indiba da·o ia bijoli krongrang maram cha·e be·angengaha aro ia krongrang silitingrangchisa rake dongaiengahachim.
“Ia bijoli krong ge·gnini serial nombor-ara 05L033110T aro 05L033110U ong·a aro ia krongrangko man·a dipet ta·raken te·srena nangengaha maina ian Tura Govt College Field-ni wilwilao songdongenggipa manderangna namen kenna nangani ong·enga,” ine Arengh parakataha.
FKJGP-GHZ president-ni parakatani gitade, Tura Govt College Field-oni Lower Mission Compound-ona bijoli silitingko salanggipa bijoli krongba maram cha·e ka·sinsin be·angengaha aro ia krongba jolo songdongenggipa manderangna kenchakna nangani ong·engahachim.
“Ia apsan gittimon, St Anthony’s School-ni janggilchipak, chi jokna tarigipa nalao bijoli krong ge·sako songaha aro ia bijoli krongba manderangna kenchakna nangani ong·enga,” ine Arengh parakatenba, ia bijoli krongrangko ta·raken te·srechina gita MeECL-ni Additional Chief Engineer-ko didiataha.
