U·IATTIMGIPAONI
SHILLONG: Re·baenggipa 2024 bilsio ong·atna sienggipa Lok Sabha election-o Meghalaya a·dokni damgni parliamentary seat-rangna, chong·motan Shillong aro Tura Parliamentary seat-na candidate sakgnini bimingko National People’s Party (NPP)-ni state election committee, NPP-ni national president Conrad K Sangma-na watataha ine Budbar salo, a·dokni Deputy Chief Minister aro NPP-ni state president Prestone Tynsong parakataha.
Ia candidate sakgnini bimingrangko NPP-ni state president parakjahaoba, Shillong Lok Sabha constituency-oni susana a·dokni Cabinet Minister Ampareen Lyngdoh aro Tura Lok Sabha seat-oni susana da·o ong·enggipa Tura-ni MP Agatha K Sangma-ko state election committee, NPP-ni national president-na recommend ka·ataha ine NPP-ni mitam dilgiparang parakatskaaha.
Tynsong-ni aganani gitade, Shillong Lok Sabha seat-oni susana gita NPP-ni tikitna dorgasto galgipa manderang bang·en dongachim indiba candidate-rangko NPP-ni state election committee name nipilangenba, ia candidate sakgniko recommend ka·na tik ka·angaha.
2019 bilsini Lok Sabha election-ode NPP, United Democratic Party (UDP) baksa common candidate-ko seokna tik ka·grikahachim indiba ia changode darang dolrang baksaba iandake songgigrikanirang dongjani gimin NPP, doltangari susaenga ineba NPP-ni state president parakataha.
