U·IATTIMGIPAONI
TURA: MGNREGS-ni tangka paisarangko jakkalsreta ine matnangenba, North Garo Hills a·jao donggipa Nameram songni VEC president, secretary aro uamangni nokdangni manderangni kosako Pillip Marak minggipa job card holder saksa, Kharkutta Police station-o FIR ka·doangaha.
Ia mandeni FIR-o parakatani gitade, Nameram songo CC Pavers Block Road-ko tarina chamatgipa MGNREGS-ni gong lak 5 tangkarangko VEC-ni president aro secretary baksana uamangni nokdangni manderang, oke ra·ahachim.
Ia tangkarangara, job card gnang kamko ka·e cha·enggipa songni manderangna chamatgipa tangka paisarangsa ong·achim ine janapatengon, iani bidingo job card donggipa manderang, VEC secretary-o sing·sandion, semi skilled labour-rangnade hajira chamata dongja inesa ua aganchakaiaha indiba iani bidingo RTI ka·on, VEC secretary, ong·gija lekkakosa songni manderangna mesokaha ine ma·sina man·aha.
Iani bidingo Kharkutta Block-ni BDO-na ka·ani ja·man November 2 tariko dingtangmancha inquiry-ko dakataha aro VEC-ni secretary-ko skilled aro semi skilled labour-rangna hajira gamchina ge·etahachim indiba da·alonan ua tangka paisarangko gamkujaenga ine Marak, FIR-o parakataha.
Ia obostani bidingo official-rang ma·siani ja·man, VEC secretary-ni pagipa, gipin biapni manderangko rimbae kamko ka·ataha aro iako job card donggipa manderang jegaltokahaoba, uamang manigija kamko matchotdraataha ineba ua matnangataha.
Kamko ka·anio job card donggipa manderangni soirangko ra·jahaoba attendance sheet-ode uamangni soirang dongskaaha ineba VEC secretary-ni kosako Marak matnangataha.
