U·IATTIMGIPAONI
SHILLONG: Re·baenggipa 2024 bilsini Lok Sabha election-o Shillong Parliamentary constituency-oni susana gita a·dokni Cabinet Minister aro East Shillong-ni MLA Ampareen Lyngdoh-ko National People’s Party (NPP)-ni candidate-na seokahani gimin ia election-o Ampareen Lyngdoh-ko cheatna gita rakbee kamko ka·gen ine Mawsynram-ni gitcham MLA aro BJP-oni NPP-o napanggipa HM Shangpliang, Bristibar salo kobor ra·timgiparangna parakataha.
“Ampareen Lyngdoh-ko candidate-na seokahani gimin NPP-ni dilgiparang namgipa ja·kuko de·aha. Ia election-o ua chegipa ong·na man·telgen aro anga an·tangba uko chegipa ong·atna gita rakbee kamrangko ka·gen,” ine Shangpliang aganaha.
Lok Sabha election-o Shillong Lok Sabha seat-oni susana miksongesa ua BJP-oni NPP-ona napangahachim ine agananikoba Shangpliang raken jegalataha.
“Anga Shillong Lok Sabha seat-oni susana miksongesa BJP-oni NPP-ona napangaha ine songbadrango seanirangara kakket ong·ja maina anga maming niam grisa NPP-o napaha,” ine ua aganaha.
Re·anggipa September jani 13 tariko uni NPP-o napangani somoio Shangpliang an·tangan maming niam donani grisa NPP-o napengaha ine kobor ra·timgiparangna parakatahachim ine nikna man·a.
Salsabatroro NPP-ni bilakbaroroenganiko nike ua kusi ong·a ineba Mawsynram-ni gitcham MLA aganaha.
“Election-o susana gita NPP-ni tikitko bi·enggipa manderang bang·en dongani gimin ian NPP-ni dal·roroenganiko mesokanian ong·enga. NPP-ni tikitko constituency ge·sao candidate saksanasan on·na man·aigen aro ia tikitko Ampareen Lyngdoh-na on·ahani gimin anga an·tangde kusi ong·a,” ine ua aganaha.
NPP-o napna skang, Shangpliang, Trinamool Congress (TMC)-oni BJP-o napangchengahachim aro ia 2023 bilsini Assembly election-oba ua BJP-ni tikitchian susaachim ine nikna man·a.
TMC-ona napna skangba ua Congress dolo napchengahachim indiba 2021 bilsio a·dokni gitcham chief minister Mukul Sangma aro gipin Congress MLA-rang baksa ua TMC-o napangskaahachim.
