U·IATTIMGIPAONI
SHILLONG: Meghalaya a·dokona petrol, diesel aro uandakgipa bosturangko salbaenggipa tanker driver-rangni kosako Meghalaya police-rang sinjetaniko on·na jotton ka·enga ine matnangenba, a·dokona petrol, diesel aro uandakgipa bosturangko salbajana ka·mikkenataniko on·angani ja·man a·dokni dingtang dingtang biaprango manderang kengokatanirangko man·tokahaoba, Budbar salo Meghalaya sorkarini Food Civil Supplies & Consumer Affairs department-ni official-rang, North East Petroleum Mazdoor Union (NEPMU)-ni dilgiparangko mol·molatahani gimin Bristibar salo, a·dokni dingtang dingtang biaprangona petrol, diesel aro uandakgipa bosturangko salgipa tanker garirang sokbataiaha.
Budbar salo, Meghalaya a·dokni Food, Civil Supplies & Consumer Affairs department, North East Petroleum Mazdoor Union (NEPMU)-ni membor-rang baksa Nongpoh-ni Circuit House-o tom·aniko ong·atangenba, a·dokona petrol, diesel salbaaniko dontongjachina mol·molatahachim ine nikna man·a.
Ia tom·anio Petroleum Dealers Association of Meghalaya, Meghalaya Indane Distributor Association aro IOCL, BPCL, HPCL gita dakgipa Oil Marketing Company-ni official-rangba bak ra·angtokahachim.
A·dokona petrol, diesel, LPG aro uandakgipa bosturangko salbaenggipa gari aro manderangni kosako skatang bilrangko jakkaljachina gita a·dokni police-rangko didiatengon, Meghalaya a·dokona petrol aro uandakgipa bosturangko salbaaniko dontongna manchianiko ra·galpilchina gita Food, Civil Supplies & Consumer Affairs department-ni Commissioner & Secretary Pravin Bakshi NEPMU-koba mol·molatahachim.
“Bristibar salo, petrol, diesel aro uandakgipa bosturangko salgipa tanker-rang, pangna salbarongenga gitan a·dokni dingtang dingtang biaprangona salbataiaha aro uamangni strike-ko Bristibar pringon ra·galataha. Meghalaya a·doko da·o dipet chu·onga gitan petrol, diesel, LPG aro uandakgipa bosturang donga,” ine Bristibar salo, Bakshi kobor ra·timgiparangna parakataha.
