Shillong: Meghalaya Democratic Alliance Coalition-ni dilgipa NPP-ni Lok Sabha election-na candidate-ko parakatanina UDP kusi ong·ja gita dakenga.
2019 Lok Sabha election-o, NPP, UDP-ni (Jemino Mawthoh) candidate-ko seokanio chak-paha, indiba ua ge-2 party-an da·o re·baenggipa Lok Sabha-ni bidingo dingtanggrikaha.
UDP-ni working president, Paul Lyngdoh agana, NPP an·tangni candidate-ko Shillong Lok Sabha Election-na seokman·ahachim, gimin candidate-ko seok-taianira kattan dongjaha.
NPP-ni state president, Prestone Tynsong agana, indakgipa candidate-ko seokanio maming ku·-mongani dakjani gimin, NPP ia chango jakgitel ong·e seokaniko dakaha, indiba 2019 bilsio indake ong·jaha, ua somoio apsan melie, UDP-ni candidate-ko seokanio apsan melie ra·chakaha.
HYC-ni gitcham president Robertjune Kharja-hrin-ko Shillong-oni UDP ticket-o susannioni skang-gipa gadango donggipa ong·engama? ine sing·anio Lyngdoh aganchaka, ua gitchamgipa president da·omitingo Shilllong parliamentary seat-o susana gisik on·aniko mesokenga, ine aganaha.
“Da·omiting somoio, ticket-na susagiparang sak 3 ba sak 4 dongaha, indiba iani bidiingo re·baenggipa salrango chanchianiko dak-anggen,” ine ua agandap-aha. Ua aganna, UDP-ni state election committee mitam tom·anirang dakangaha, aro ia somoio ADC election-naba tarie dongsoenga.
“Chinga January jaani bon·angachira candidate-rangni list-rangkoba tarisoani ong·enga,” ine ua agandapaha.
