U·IATTIMGIPAONI
SHILLONG: East Garo Hills a·jao Eco-Tourism project-na chamatgipa tangka paisarangko jakkalsreta ine matnanganiko Mongolbar salo, a·dokni Tourism Minister Paul Lyngdoh jegalataha.
Ia project-ni bidingo talataniko on·angengon, Garo Hills-o ming 12 Rural Eco-tourism circuit project-rangko 2017 bilsio NEC chamataha aro ia project-rangoni dam 9-de East Garo Hills-o, damsade West Garo Hills-o aro damgnide South West Garo Hills a·jao ong·e ia chu·gimik project-na chamatgipa tangka paisarangara gong kror 14.39 ong·achim ine Tourism Minister parakataha.
Lyngdoh-ni aganani gitade, ia biap damprakon gong lak 9.91-ni nokrangko, bedroom, common room, toilet aro uandakgipa kuturirang baksa rikani kamrang ong·achim.
Ia project-na chamatgipa gong kror 14.39 tangkarangoni matchotgimin kamrangna gong lak 1361.45-kode contractor-rangna gamanaha aro je matchotkugijagipa kamrangba da·o matchotna siengahachim ine Lyngdoh parakataha.
Ia kamrangko matchotkujaengani gimin talataniko on·angskaengon, nokrangko rikenggipa biaprangona ramarang dongjani a·sel, wachini somoirango kamrangko ka·na man·jahani a·sel, East Garo Hills-o bye-election-ko ong·atani a·sel aro lockdown ong·atachiba kamrang ja·donggaatako man·aha ine Tourism Minister parakataha.
Ia project-rangoni East Garo Hills a·jao Gitokgre Eco-tourism-ko matchotgija galchipaha ine adita salrangna skangsan, Niksamso Garo Community Organisation (NGCO), RTI dake am·sandiani ja·man, kobor setimgiparangna parakatahachim ine nikna man·a.
