U·IATTIMGIPAONI
TURA: Chatro chatrirangni man·na nangenggipa scholarship-rangko man·kujaengani a·sel, bang·a chatro chatrirangan neng·nikanirangko chagrongna nangtokengaha ine Garo Students Union (GSU) Eastern Zone parakatenba, scholarship-ni tangka paisarangko ta·rake watatchina a·dok sorkariko didiataha.
Iani bidingo a·dokni Chief Minister Conrad K Sangma sedoatengon, bang·bata chatro chatrirangan, mongsongbate kangal cholri ong·pagipa chatro chatrirangde an·tangtangni college fee, ki·tap aro gipin nangchongmota kamrangna scholarship-on pangchakna nangtokpaengachim indiba ia bilsiode scholarship-rangko man·tokkujaengani a·sel bang·bata chatro chatrirangan an·tangtangni college fee-rangko, exam fee-rangko aro uandakgipa nanganirangna koros ka·na man·tokkujaenga ine GSU-EZ-ni dilgiparang parakataha.
“Scholarship-rangko antisa antignini gisepon watatgnok ine November 20 tarikosan a·dokni Education Minister Rakkam A Sangma parakatahachim indiba da·alonan scholarship-ni bidingo maming kobor dongtaikujaenga. Chatro chatrirang pangna bilsian porikka sena skang an·tangtangni exam fee-rangko gamna nanga indiba scholarship-rangko man·tokkujaengani a·selan cholgri ong·pagipa chatro chatrirangde exam fee-rangkoba gamna man·tokkujaenga,” ine GSU-EZ parakatenba, chatro chatrirangni scholarship-rangko on·na man·na gita ta·raken tangka paisarangko watatchina Chief Minister-ko mol·molataha.
