U·IATTIMGIPAONI
SHILLONG: Meghalaya a·dokni pilak Smart City Project-rangko, a·dokni Deputy Chief Minister aro Urban Affairs Minister Sniawbhalang Dhar, Budbar salo niangna sienga.
Dhar-ni parakatani gitade, ia pilak Smart City project-rangko ua an·tangan re·ange nienba, kam ka·anirangko nipilanggen.
“A·dokni pilak Smart City project-rangko anga nipilanggen aro kam ka·anirang baditaba kingking matchotengaha, uarangkoba niangjolgen,” ine Urban Affairs Minister aganaha.
Deputy CM-ni parakatani gitade, Smart City project-ni ning·o ga·akgipa kamrang, jekai Laitumkhrah market, Polo market, Anjalee parking lot, Motphran parking lot, chiring chibisikrangko rongtalatani aro uandakgipa pilak kamrangkon ua nianggen.
Smart City project-ni ning·o dingtang dingtang kamrangko ka·na gita sorkari gong kror 200-na baten tangka paisarangko chamatahachim ine nikna man·a.
Ia tangkarangoni kror 140-ko ma·mong sorkari aro gong kror 55-kode a·dok sorkari chamataha ineba Urban Affairs Minister parakataha.
Munipality area-ni ning·o smart road-ko tarina gitaba sorkari, gong kror 80 tangkarangko chamatahachim.
