U·IATTIMGIPAONI
TURA: Road Safety ba ramarango naljokanirangko on·ani bidingo agan-talate on·na gita Sombar salo, dingtangmancha awareness program-ko Tura-ni Don Bosco College-o ong·atangaha aro ia program-ko Tura Motor Sports Club, West Garo Hills District Police aro District Transport Office baksa nangrime ong·atangaha.
Ia awareness program-ko ong·atanio, chatro chatrirangna agan-talate on·anggipa manderangara, Additional SP (Traffic) Challang G Momin aro District Transport Office-ni Enforcement Officer Twilight T Sangma ong·a aro uamang sakgnian, traffic-ni dingtang dingtang niamrang, jekai Motor Vehicles Act, gari salna dongimin niamrang, dosko dakani somoio man·na nanggipa sastirang aro uandakgipa niamrangni bidingo agan-talate on·angaha.
Jillao traffic-ko nirok sandianio mai dakgipa neng·nikanirangko Traffic department-ni gita chagrongna nanga, uarangni giminba ia tom·anio jinmana chanchirimangaha.
Tura jillao traffic-ko name nirokna man·na gita pilakkon police-rang baksa bakrimchina gitaba ia program-o skie on·gipa manderang didiataha.
Ramao gari gorarangnasan ong·aigija ja·arangchi re·enggipa manderangnaba naljokaniko on·na man·na gita gari gorarangko simsake salchina gitaba uamang chatro chatrirangna ku·pattianirangko on·angaha.
Ia program-ko ong·atanio chatro chatrirangni ma·sina sike sing·anirangnaba official-rang agan-talate on·angtokaha.
