B’desh-ona palsrukatenggipa chini baksana sakbriko SGH-o rim·a

U·IATTIMGIPAONI

SHILLONG: Adita salrangna skang, Bangladesh a·songona pik-up gario niam gri palsrukatenggipa chinirangko South Garo Hills a·jani Rongara sima jolo BSF sipairang rim·rikna gita man·aha aro ia chinirang baksana mande sakbrikoba rim·na man·aha.

Rim·ako man·gipa manderangoni saksade Bangladesh a·songni aro sakgittamde India a·songni manderang ong·achim.

BSF official-rangni u·iatani gitade, 1^st Battalion BSF-ni sipairang, sima jolo nirikkianirangko dakengmiting somoio Rongara jolchipakni re·baenggipa pik-up gariko rim·sona man·aha aro ia garioniko am·sandion, Bangladesh a·songona niam gri palsrukatenggipa chinirangko man·aha.

Ia chinirangni bidingo BSF-ni sipairang, gario re·baenggipa mande sakbrio sing·sandion, uamang name aganchakna man·jaha aro ia chinirangko salna gita maming lekkarangkoba mesokna man·jaha.

Rim·ako man·gipa manderangoni saksade, Bangladesh a·songni Netrakona a·jao donggipa Gobindpur songni Mohammed Shamim minggipa mande ong·achim aro gipin sakgittam manderangara, Arapara songni Amorjit Hajong, Rongara Sanbana songni Engling Sangma aro Arapara songni Ramakey R Marak ong·achim.

Ja·mano rim·a man·gipa chini baksana mande sakbriko BSF sipairang, Rongara police station-na pakwate on·ataha.