SHILLONG: Bostu salgipa rel garirangko a·dokona ra·baanichi a·dokni manderangan namgnirangko man·gen ine adita salrangna skang United Democratic Party (UDP)-ni general secretary Jemino Mawthoh aganahani gimin Meghalaya a·doko niam gri napsrukanirangko champengna gita Inner Line Permit (ILP)-ko ra·gate on·kujaskal Jaintia Hills a·jao rel garirangko ra·chakna man·kujawa ine Jaintia Students Union (JSU) parakataha.
A·dokona rel gari ra·baaniko a·bachengonin JSU-ba jegalengachim ine janapatengon, a·doko ILP-ko ra·gate on·genchimosa rel garirangko ra·bana on·gen ine JSU-ni general secretary Trebor Suchen parakataha.
“Jaintia Hills a·jaona chinga changsaba rel garirangko ra·chakgen ine ku·rachaka dongkuja aro ILP-ko ra·gate on·kujaskal rel garirangko raken jegalsoaigen,” ine Suchen aganaha.
Suchen-ni aganani gitade, a·dokona niam gri napsrukanirangko champengna gita ILP-ko ra·gate on·genchimosa a·dokni manderangba rel garirangko ra·chakna kusi ong·gen.
“ILP-ko ra·gatgenchimode rel garirangko ra·chakna man·naba gnang. Niam gri napsrukanirangko champengna gitade ILP-an bilakbatgipa niam ong·enga. Uni gimin chinga skanggipa ILP-ko dabienga aro ILP-ko on·genchimosa rel garirangni giminde chanchigen,” ine JSU-ni general secretary aganaha.
ILP-ko ra·gatani bidingo ma·mong sorkari baksa agangrikchina JSU, a·dok sorkarina pakwatenga ineba ua aganaha.
“A·dok sorkari tusichipe dongaigija ILP-ko ra·gatani bidingo ma·mong sorkariko dekdo ka·na nanga. ILP-ko man·ahaode a·doko namroro silroroaniba sokbaaigen,” ine Suchen aganaha.
Meghalaya a·dokona bostu salgipa rel garirangko ra·baanichi a·dokni manderangan namgni ong·gen ine adita salrangna skangsan UDP-ni dilgiparang, bostu salgipa rel garirangkode ra·chakchina gita dingtang dingtang dolrangko didiatahachim ine nikna man·a.
“An·ching gimikankode jegale dongna man·jawa aro chinga bostu salgipa rel garirangkode nangnikenga. A·doko songdongenggipa manderangna mai nambatgen ukoba an·ching nina gita nanggen maina re·a doani kolrangko namdapatanichi an·ching songni nokni manderangna bading chiwale cha·anio bang·en namgnirangko ra·bana man·gen,” ine UDP-ni general secretary Jemino Mawthoh, a·dokona rel gari ra·baaniko dingtang dingtang dolrangni jegaltokengani gimin aganahachim.
