SHILLONG: Ma·mong sorkari aro a·songni dam 23 a·dokrango daka gita Meghalaya a·dokoba sorkarini group B, C, aro D kamrangna personal interview ra·aniko bon·atsrangchina gita Khun Hynniewtrep National Awakening Movement (KHNAM), a·dok sorkario dabiangkuna tik ka·aha.
Iani bidingo kobor ra·timgiparangna talataniko on·angengon, a·doko songdongenggipa manderangni namgnina aro mongsongbate chadamberangna kam ka·e cha·ani cholrangko on·na gita Meghalaya a·dokoba sorkarini group B, C aro D post-rangna personal interview ra·aniko bon·atchina a·dok sorkario dabiangkugen ine KHNAM-ni working president Thomas Passah parakataha.
Political dol ong·e uamang pangnan Hynniewtrep jatni nanganirangna kamrangko ka·dilenga ine janapatengon, 2002 bilsio Inner Line Permit (ILP)-ko dabina a·bachengaoni, SRP 1972-ni Border Settlement, Review aro uandakgipa dingtang dingtang kamrangni bidingo KHNAM ku·rangko on·enga ine Passah parakataha.
Ia nangchongmotgipa kamrang da·alonan chu·sokna man·kujaenga ineba ua an·tangni suk ong·gijaniko parakataha.
“Ia kamrangni gimin niatpilgenchimode a·doko songdongenggipa manderangni nanganirangko a·dokni dingtang dingtang sorkarirang chu·sokatna gita gisik nangtokjaha ine an·ching aganna man·gen,” ine KHNAM-ni working president aganaha.
A·dokni dingtang dingtang nanganirangna ku·rang on·e kamrangko ka·dilanio neng·nikanirangko chagrongna nangengoba, jatni namgnina uamang kamrangko ka·angkuna gita adita salrangna skang ong·atanggipa KHNAM-ni general council-o ku·mikchetaniko dakangaha ineba Passah parakataha.
