TURA: Tura-ko Winter Capital songchina aro Job Reservation Policy (JRP)-ni roster system-ko backlog policy-o ra·gatchina dabianio gipin dilgiparang baksa meligrikna man·jahani gimin gital dake jatni nanganirangna dabidilskana gita A·chik State People’s Front (ASPF) dolko bikotaha ine dolni dilgiparang u·iataha.
Koborko on·ani gitade, ia gital ASPF dolko ACHIK dolni gitcham dilgipa (gitcham MCS officer) Laben Ch Marak aro advocate Bernita R Marak dilenga aro ia dol, Mahatma Gandhi-ni bebera·ani gita maming dakgrik dinggrikani gri aro so·sojengjeng ong·atani gri jatna aro a·songna kamko ka·anggen.
“Ia gital dolko chinga, ong·gija kamrangni kosako ku·rang on·na aro jatni man·gnirangna dabidilna gita bikotaha aro chinga maming an·chi pari nikani gri aro so·sojengjeng ong·atani gri krenge kam ka·anichi chingni dabianirangko chu·sokatna ka·dongenga,” ine ASPF dolni dilgipa Bernita R Marak aganaha.
Songsalko pilakni gitan ra·dona aro ong·gija kamrangko namaona ra·bana miksonge ia dolko bikotaha ine ASPF dolni sakgipin dilgipa aro gitcham MCS officer Laben Ch Marak parakatskaaha.
“Tura-ko Winter Capital songchina dabianio somoirangko nangnaba gnang indiba an·ching A·chik a·songni jong-ada no-abi pilakan bakrimgenchimode ia dabiani chu·sokgipa ong·chongmotgen ine chinga bebera·a. Ia dabianirangko chinga maming so·sojengjeng ong·atani gri aro an·chi pari nikani gri chu·sokatna nangnikenga,” ineba Marak aganaha.
Ia gital ASPF dolni unit-rangko Tura, Williamnagar, Gambegre, Tikrikilla , Raksamgre , Phulbari, Rongram, Kherapara , Rajabala, Garobadha, Nongalbibra, Ampati, Rongjeng aro Assam-oba songaha ineba ASPF-ni dilgiparang u·iataha.