SHILLONG: Lok Sabha election-na skang dolsa dolgipinni gisepo matnanggrikanirang a·bachengtaiengahaon, Congress dolara gitcham golpo gitasan ong·aiaha aro NPP-sa a·dokko chalaikamnagipade ong·aijok ine National People’s Party (NPP)-ni dilgipa aro a·dokni Education Minister Rakkam A Sangma parakataha.
Sangma-ni aganani gitade, Congress dolni gimin aro uamangni kamrangni gimin manderang da·o poraie ronasan man·aiaha aro NPP-sa a·dokni ka·donganide ong·engaha.
Shillong Lok Sabha constituency-ni bidingo janapatengon, Shillong Lok Sabha seat-na NPP, Ampareen Lyngdoh-ko candidate-na seoke nambatgipa candidate-kon seokaha ine Sangma parakataha.
Batanggimin bilsirango ka·gimin kamrangna aro a·dokna bang·en on·gilanirangko dakahani gimin ia Lok Sabha election-o manderang Congress dolkon seoktaigen ine adita salrangna skang Congress dilgiparang aganahani gimin Sangma ia kattarangko aganaha.
Kamrangko lekkarangchide mesokna man·ja indiba changa sapanichisa mesokna man·a ine janapatengon, “Batanggimin bilsi bongani gisepo angni constituency-ni ning·o anga namen nambegipa ramako song damsao tariahachim indiba batanggimin chang election-o ua songni manderang angna pu·onjaha. Uni gimin politics-ode dilgiparang maiko daka ba dakja uko nija indiba manderangni skaniosa pangchakaia,” ine Siju-Rongara Constituency-ni MLA aganaha.
“Congress-ni somoio a·song jakgitelaniko man·aha indiba Congress da·o baojok? APHLC-ni somoioba Meghalaya a·dokko man·aha indiba APHLC da·o baojok? Manderangde party-kosan niaia ong·ja indiba dilgipakosa nia,” ineba Sangma aganaha.
Congress dolni kosako matnange aganangkuengon, “Gitcham golporangde poraianisan ong·aia indiba kam ka·ani ong·jaha. Anga Captain Williamson Sangma-ni gri-angsu ong·a aro angako iako aganenba angna pu·onchina aganode manderang angna pu·ongenma? Skang somoirango Congress maiko dakaha uade gitcham golporangsan ong·aiaha. Da·o Shillong aro a·songni manderang, gitcham golporangko poraipiltaienba, da·o sawa nambate kamko ka·na man·a, uko basechinaha,” ine Sangma parakataha.
Bilsiantian sak 20,000-na baten chatro chatrirang graduate ong·angenga indiba sak 2000-mangni gitasan sorkari kamrangko man·enga ine janapatengon, badia dol aro dilgiparang kamrangko nakatate on·enga uko kamgri ong·e dongenggipa chadamberang aro chatro chatrirang ma·sichina ine Education Minister parakataha.
Ia chang Lok Sabha election-o a·dokni Lok Sabha seat damgnikon NPP chegen ineba Sangma, an·tangni ka·dongchakenganiko parakataha.
