TURA: Tura-ni Pa Togan Nengminja Sangma Athletics Stadium (Track & Field Stadium)-ko Sukrobar salo, a·dokni Chief Minister Conrad K Sangma, Sports & Youth Affairs Minister Shakliar Warjri baksa kulie on·angaha aro ia stadium-ko kulie on·anganio, Meghalaya Assembly-ni Speaker Thomas A Sangma, a·dokni PHE Minister Marcuise Marak, Kharkutta-ni MLA Rupert Momin, Mahendraganj-ni MLA Sanjay A Sangma, Meghalaya State Olympics Association-ni dilgiparang aro gipinrangba dongpae bak ra·angaha.
Ia Pa Togan Nengminja Sangma Athletics Stadium-ko kulie on·angani somoio a·dokni Chief Minister, jinmana aganprakengon, Tura-o skanggipa changna sokachakenggipa Meghalaya Games 2024-na ia stadium-ko somoi gita kulie on·na man·ahani gimin an·tangni kusi ong·aniko parakangaha.
Ia Track & Field Stadium-ara Tura-o skanggipa athletics stadium ong·enga aro ia stadium-ko kulianichi, ian Meghalaya Games-o bak ra·enggipa a·dok gimikni kal·susagiparangna namgni ong·gnok ineba ua aganaha.
Re·baenggipa somoirango, Track & Field, Natural aro Artificial Ground, Indoor aro Outdoor Stadium-rangko a·dokni dingtang dingtang biaprango rike on·angkugen ineba Chief Minister parakataha.
Iandakgipa stadium ba kal·chakram biaprangko rike on·anichi da·o bilsi gittam ba bilsibrini gisepon Meghalaya a·dokko kal·chakram biaprango nambatsranggipa a·dok ong·atna sienga ineba Sangma aganaha.
“Ia project-rangko anga an·chingni pilak kal·susagiparangna pakwate on·enga,” ine Chief Minister parakataha.
