Shillong: A·dok Sorkari, haida mikkang February jani skanggipa antion Meghalaya State Commission for Women (MSCW)-ni gitalgipa Chairperson-ko songgnokkon.
Koborni manderangna aganengon, advertisement-o on·gimino gita dake MSCW-na gital chairperson-ko songna gita dorgastorangko on·ani somoiko ari donmanaha aro pilak dakgni kamrangko January bon·achi matchotatgen ine Social Welfare Minister, Paul Lyngdoh parakaha.
“Pilak ka·gni kamrangko ka·na gita chinga deadline ba ariko donaha. Indake chinga da·o re·baenggipa February jani skanggipa antio chanchina asongon, Chairperson-ko seokna man·aignok gita nikenga,” Lyngdoh aganaha.
Unomitingo, Search Committee-chi seokgijagiparangba chol man·pana gita chinga advertisement-ko on·manaha ineba Social Welfare Minister aganaha.
Indake chingnade dorgasto galna cholrangkoba on·paja ine darangba jachana man·jana gita chinga iarangko dakenga, ineba ua aganaha.
“ Chingaba Chairperson-ni kamna kraachim, indiba chingkode search committee biming mingjaha ine mitam manderang chingko aganaha, unigimin chinga pilaknan apsan cholrangko on·na nangnikaha, ja·mano krabatgipa manderangko seokgen,” Social Welfare Minister aganaha.
MSCW-ni gitcham chairperson Phidalia Toi-ni da·sikkari June jao kam wata intalan Commission, chairperson gri ong·enga.
