SHILLONG: 15th Finance Commission-ni recommend ka·anio pangchake, a·dokni damgittam autonomous district council (ADC)-rangna gong kror 500 tangkarang bangki dongkuenga ine Sukrobar salo, Khasi Hills Autonomous District Council (KHADC)-ni Chief Executive Membor (CEM) Pyniaid Sing Syiem parakataha.
Sukrobar salo, KHADC, JHADC aro GHADC-ni dilgiparang baksa a·dokni Deputy Chief Minister aro District Council Affairs Minister Prestone Tynsong-ni tom·e chanchirimangani ja·man iako KHADC-ni CEM parakataha.
Ia tangkarangko bakan a·dokni damgittam ADC-rangna watatgnok ine janapatengon, 15th Finance Commission-ni term bakan bon·gnok aro uni ja·man 16th Finance Commission-ko songskagnok ine Syiem parakataha.
“A·dokni damgittam ADC-rango dingtang dingtang nanganirangko chu·sokatna gita chinga Panchayati Raj official-rangni a·dokona re·baani somoio uamangni dakchakanichi namatna man·aha,” ine KHADC-ni CEM aganaha.
Panchayati Raj Ministry-ni e-gram swaraj portal-ko ra·gatanichi a·dokni damgittam ADC-rang, an·tangtangni proposal-rangko internet gita on·na man·gnok aro iana a·dokni damgittam ADC-rang kusi ong·a ineba ua aganaha.
“Da·ode chinga dingtang dingtang songrangni ba gittamrangni proposal-rangko e-gram swaraj portal-o internet gita upload ka·na man·aignok,” ine Syiem aganaha.
