SHILLONG: Re·baenggipa February 16 tarikoni a·bachengatenggipa Meghalaya Legislative Assembly-ni Budget Session-o a·dokni Opposition dolrang, chong·motan Trinamool Congress (TMC), Congress aro Voice of the People’s Party (VPP) dolrang, a·dokni nangchongmotgipa kamrangni gimin apsan ku·rang on·na man·na gita ia session-na skang apsan tom·aniko ong·attaina tik ka·angaha.
Iani bidingo kobor ra·timgiparangna u·iatengon, Opposition dolrangni skanggipa tom·anio VPP-ni MLA-rangsan bak ra·aiaha aro TMC-ni MLA-rangde, dingtang dingtang kamrangni a·sel bak ra·na man·tokjahani gimin da·o tom·aniko ong·attaina tik ka·aha ine Opposition dolni dilgipa Ronnie V Lyngdoh parakataha.
Da·o gnigipa changna Opposition dolrangni tom·aniode TMC-ni MLA-rang baksana Congress aro VPP-ni MLA-rangba bak ra·angtokgnok ineba Lyngdoh parakataha.
Lyngdoh-ni parakatani gitade, da·o dipet Opposition dolrangni gisepo bakrimna tik ka·anide dongkuja indiba a·dokni dingtang dingtang nangchongmotgipa kamrangni gimin apsan ku·rang on·na gitasa manchikuenga.
“VPP aro TMC dolgnian angni ku·monganiko knachakahani gimin anga kusi ong·a,” ine Opposition dolni dilgipa aganaha.
Batanggimin chang Autumn Session-ko ong·ataniode a·dokni dolgittam Opposition dolrangni gisepo nangrime ku·rang on·ani dongjahachim aro uandaken dingtang dingtang kamrangni bidingo ku·rangko on·anirang bilakbrejahachim ine nikna man·a.
Iani giminsa Congress Legislature Party (CLP) aro Opposition dolni dilgipa Ronnie V Lyngdoh, ia chang budget session-ode Opposition dolgittamkon apsan nangrime ku·rang on·na ku·mongchengahachim.
