TURA: Labour, Employment & Skill Development Department-ni ning·o Meghalaya State Skill Development Society (MSSDC)-ni salgnina ong·atenggipa ‘Skillerate Connect’ program-ko Bristibar salo, New Tura-ni Matchakolgre LP School kal·chakramo a·bachengataha.
Ia program-ko a·bachengatanio, West Garo Hills a·jani Assistant Commissioner Aditya Verma, jinmana aganprakangengon, jakni kamrangko changgipa sapgipa manderangni gamchatgipa ong·ani, uamangni on·gilani aro tangka paisarangko kamaiani cholrangni gimin janapangenba, jakni kamrangko changgipa sapgipa manderangde pangnan changgija sapgija manderangna bate janggi tangani cholrang bang·bata ine parakataha.
An·tangtangni changa sapani ba u·i-ma·sianirangko namdapatanian mandeko chubata gadangona ra·dogipa ong·a ineba ua aganaha.
Ia program-ko ong·atanio, Zonal Sericulture Officer Sanre G Momin-ba jinmana aganprakengon, Skills Meghalaya program-ni ning·o chadamberangna practical program-rangko ong·ate janggi tangani cholrangko on·na miksongani donga ine parakataha.
Bading chiwalgiparangnasan ong·aigija jakni kamrangko skie on·enggipa department-rangnaba MSSDS, tangka paisarangko dakchake on·enga ine janapatengon, a·doko Eri aro Muga gamgiparangna training-rangko on·na gita Sericulture department-ba MSSDS-ni tangka paisani gita dakchakaniko man·aha ine Momin parakataha.
Ia program-ko a·bachengatanio, West Garo Hills a·jani Assistant Commissioner, Haat Bazar-ko kulie on·angenba, ia Haat Bazar-o dongimin stall-rangkoba niangjolaha.
Ia program-ko ong·atanio dongpae jinmana aganprakanggipa gipin manderangara, MSSDS-ni official Closterfield Lyngdoh, West Garo Hills-ni Skill Development Officer Sabina D Sangma, South West Garo Hills-ni Skill Development Officer Tengsilchi Ch Sangma aro gipinrang ong·a.
