TURA: North Garo Hills a·jani Kharkutta C&RD Block-ni ning·o donggipa Mendima Government Lower Primary (LP) School nokni obosta namsrangjahani a·sel skulo poraienggipa bi·sarangsan ong·aigija skulo skie on·enggipa aro gipin kamrangko ka·gipa manderangba neng·nikanirangko chagrongna nangtokenga ine A·chik Youth Council (AYC) parakatenba, ia skul nokko ta·raken taridape on·china, a·dokni Education Minister Rakkam Sangma-ko didiataha.
AYC-ni general secretary Maxbirth Gabil Momin-ni parakatani gitade, ia skulara 1941 bilsio kuligipa skul ong·e Garo Hills gimiko gitchambatsranggipa skulrangoni damsa ong·engachim indiba da·o ia skul nokni obosta namsrangjaengahani a·sel poraienggipa bi·sarangna neng·nikani aro kenchakna nanganiba ong·skaengahachim.
“Skanggipao ia skul nokni nokkingko taridapna nangengaha maina da·o wachi sokbaahaode mikkarang selpruprue, class-rangko ra·na man·taijawaha. Ian class ra·aniko champenga gitasan ong·aigija chatro chatrirangna aro skulo kam ka·enggiparangnaba namgijaniko ong·atenga. Ia skulo asongchakani aro sechakani table-rangba gitchamahani a·sel skulo poraienggipa bi·sarang neng·nikanirangko chagrongna nangtokenga. Unbaksana skulo poraienggipa bi·sarang bang·rorobaengahani gimin asongchakani aro sechakani table-rangba chu·ongjaengahani a·sel poraienggipa bi·sarang dongtogijaniko man·tokenga,” ine Momin parakatenba, ia skul nokko ta·raken taridape on·china aro skulna nangchongmotgipa bosturangko on·china Education Minister-ko didiataha.
