SHILLONG: Budbar saloba Ri Bhoi a·jani police-rang, chongipa silchidare ge·sa aro adita gopretani bosturang baksana HNLC bobil dolni nisan aro lekkarangko man·taiaha.
Mongolbar salo, HNLC bobil dolni sleeper cell baksana adita gopretani bosturangko man·ani ja·man police-rang, Intelligence-ni u·iatanio pangchake am·sandianirangko dakangkuenba ia silchidare aro gopretani bosturangko Budbar saloba man·taiaha.
Nok te·sako sandiengmiting somoio rim·ako man·gipa mande (sleeper cell)-ni parake on·ani ja·man, ia gopretgipa bosturangko police-rang man·aha.
Iani bidingo kobor ra·timgiparangna talataniko on·angengon, Meghalaya a·dokni dingtang dingtang biaprango bomarangko gopretna gita HNLC bobil dol, sleeper cell-ni membor-rangna tangka paisarangko aro gari gorarangko on·aha ine a·dokni police official-rang parakataha.
Police-rangni parakatani gitade, Bangladesh-o donggipa HNLC bobil dolni dilgiparangsa, ia sleeper cell-rangna ge·etanirangko on·timengachim.
Ia apsan sleeper cell-ni membor-an batanggimin bilsirangoba Bangladesh-o dongnue dongenggipa HNLC dilgiparangni ge·etaniko man·e HNLC bobil dolni nisanrangko songe donahachim ineba police official-rang parakataha.
Harijan Colony sambao IED boma gopretanio jak donggipa sakgipin mandeko Budbar salo police-rang rim·ani ja·man, police-rang iani bidingo ma·sina man·aha.
