BAGHMARA: South Garo Hills a·jao rama tarienggipa mande saksako Rongdik songo uamangni dongchakenggipa a·tiponiko ong·gija dakgipa manderang rim·gittangangakon ine police-rang chanchichipenga.
Ia mandeara Uttar Pradesh a·dokoni bilsi 50 ong·gipa Akhilesh Chauhan ong·achim aro ua re·anggipa March 20 tarik pring 1:40 bajimangonin uamangni dongchakenggipa a·tiponi gimaengahachim.
Iani bidingo unbaksa kam ka·rimenggipa manderang FIR-ko Siju police station-o ka·aha aro FIR-o janapani gitade, March 20 tarik pringo ma·sina man·gijagipa manderang, diesel am·na gita uamangni a·tipona re·baahachim.
Ia manderangni diesel bi·na re·baahani gimin ia a·tipko nirokenggipa manager, diesel dongama dongja uko nichina aro ia manderang baksa agangrikchina Akhilesh Chauhan-ko watataha. Indake ong·genchimoba ua a·tipona re·bapiljahaon, kam ka·enggipa gipin manderang, jajrengenba uko sandiangaha indiba uko nikejaha.
Ia mandeni kam ka·enggipa company-ara South Garo Hills a·jao rama jal·langrangko aro NH-127 ramako a·dokni gipin biaprango nangdimatna gita kamko ka·enggipa company ong·achim.
Ia mandeko sandio nikjahani gimin ja·mano ia company-ni manderang, jolni police-rangna u·iataha aro bakan police-rang, gimaenggipa mandeko sandina a·bachengataha.
Police-rangni u·iatani gitade, ia mandeni bidingo uamang adita sakkirangko man·na a·bachengaha indiba iani bidingo parakna gita agre seng·gnangdugakuenga. Ia mandeko uamang bakan man·pilgen ineba police-rang, an·tangtangni ka·dongchakenganiko parakataha.
“Ia mandeko jokatna gita chinga kamrangko ka·engaha aro uko bakan man·pilna ka·dongenga,” ine South Garo Hills a·jani SP Shailendra Bamaniya parakataha.