SHILLONG: Meghalaya a·dokni Shillong aro Tura parliamentary constituency-ni MP sakgniko seokna gita da·al Sukrobar salni bako a·dokni pilak biaprangon sak lak 22-na baten manderang pu·onanggen.
Shillong Lok Sabha constituency-o Congress, NPP, RDA, VPP aro Independent candidate-rangko man·chape gimik sakdok candidate-rang susaengon, Tura constituency-o NPP, Congress, TMC aro Independent candidate saksa susagrikskaenga.
Shillong constituency-oni susaenggipa candidate-ranga, Congress dolni Vincent Pala, NPP-ni Ampareen Lyngdoh, RDA-ni Robertjune Kharjahrin, VPP-ni Ricky AJ Syngkon, Independent candidate Prof Lakhon Kma aro sakgipin Independent candidate Peter Shallam ong·engon, Tura constituency-oni susaskaenggiparanga NPP-ni Agatha K Sangma, Congress dolni Saleng A Sangma, TMC-ni Zenith M Sangma aro Independent candidate Labenn Ch Marak ong·skaenga.
Lok Sabha election-o Meghalaya a·dokni damgni Parliamentary constituency-o gimik sak 22,26,567 manderang, an·tangtangni dilgiparangko seokna gita sikdepe pu·onanggen ine adita salrangna skangsan Meghalaya a·dokni Chief Electoral Officer (CEO) BDR Tiwari parakataha.
Meghalaya a·dok gimiko dam 3,512 polling station-rang gnang aro ia polling station-rangoni dam 2,288-de Shillong parliamentary constituency-o aro dam 1224 polling station-rangde Tura parliamentary constituency-o ong·enga.
Dam 140 polling station-de Bangladesh aro India a·songni sima ari jolrango onga aro dam 187 polling station-de Meghalaya-Assam a·dokni sima ari jolrango ong·skaenga ineba CEO parakataha.
