TURA: Garo Hills-o bol wa·arang skatang den·engani a·sel aro chibisik sambarango a·ba o·e cha·engani a·sel chiring chibisikrang tiproroangengahani gimin dingtang dingtang songni nokma sanerangko, songtangtango donggipa chibisik sambarango a·ba o·e cha·diljachina gita Nokma Council didiataha.
Budbar salo, Nokma Council-ni ning·o donggipa dingtang dingtang bipekni dilgiparangko okamchimongenba Nokma Council-ni gita tom·aniko ong·atangaha aro ia tom·anio, buring bolgrimrangko ripingna nangani aro chiring chibisikrangko tangatpilna nangengani gimin Nokmarang apsan chanchirimangaha.
Ia tom·aniko Nokma Council-ni president Skylance G Momin dilangengon, songo noko donggipa chibisikrango a·barangko o·e cha·jachina aro bol wa·arangko skatang den·e galjachina dingtang dingtang unit-ni dilgiparangko didiataha.
Ia tom·anio Nokma Council-ni chief adviser Daniel Watre Ingty-ba buring bolgrimrangni gamchatani gimin Nokmarangna agan-talate on·angenba, chiring chibisikrangko tangatpilna gita chibisik sambarango a·ba o·e cha·gija bolrangko ge·dapskachina gita songni nokma sanerangko didiangaha.
Ia tom·anio pilak unit-ni nokmarang aro dilgiparangba, songtangtango donggipa chibisikrango a·ba o·e cha·jana gita aro buring bolgrimrangko ripingna gita ku·rachake ra·angtokaha.
