SHILLONG: Meghalayao Congress-ko skotong ong·e re·dilenggipa State Congress Chief Vincent H Pala, da·o dipetode party-o darangchiba namnikgija dakako man·kujengaenga ine Meghalaya Pradesh Congress Committee (MPCC) working president PN Syiem mijalo aganaha.
“MPCC chief ong·e Pala-ni biapko ra·nagipa da·odipetode chingo dongkujaenga’’ ine aganan baksa State Congress-ni gisepo meligrikgijanirang ong·enga ine koborrango janganirangkoba Syiem jegalaya.
Ia chang MP election-o Pala, maibakae Shillong Parliamentary seat-oni brigipa changna seokako man·jaode party-o maiba dingtangatani donggen ine sing·on, Lok Sabha election-ni ja·man dingtanggen ba dingtangatjawa, uani gimin agannade da·o agre seng·gnangdugaenga, ua aganaha.
“Indiba anga namen ka·donga, Pala da·oba manderangni chakpaaniko man·enga. Dilgipako dingtangatani giminde chinga party-ni gisepo mamingsaloba chanchianirang sokbaja,” MPCC working president aganaha.
Indake 2023 Assembly poll-na skang skang, party-ni MLA gimik ong·kate katgrimenba party namen bilgriahaoba, ua (Pala) da·o party-ko rikpiltaina man·engaha, ua aganaha.
Uni aganani gitade, manderang Congress-o ka·dongna man·batoktaienga.
“Party-ko bilakroroatna kam ka·aniko dontongjawa. Chinga, Garo Hills-oniko namgipa koborrangko man·soenga. Chingni Tura Parliamentary seat-ni candidate, Saleng A Sangma-an, NPP Candidate Agatha Sangmana bate, Tura seat-ko chena chol dongbatenga,” Syiem aganaha.
MPCC president Vincent H Pala-ni dilanio ka·donganirang dimelja ine Congress Legislature Party (CLP) dilgipa Ronnie V Lyngdoh-ba unaskang tale aganahachim. Unomitingo Lyngdoh aro MPCC chief-ni gisepo meligrikgijanirang ong·enga ine koborrango janganikoba ua jegale aganaha.
