Jawilwat tarigipa manderangko dakchakna sorkari Film Policy-ko ra·gatgen

SHILLONG: Budbar salo, Information & Public Relations Department-ni Commissioner & Secretary Vijay Kumar Mantri, Meghalaya a·doko jawilwat tarigipa manderang baksa tom·aniko DIPR Office Complex-ni Conference Room-o ong·atangaha aro ia tom·anio jawilwat tarianio mingsinggipa manderang, chong·motan Dominic Sangma, Pradip Kurbah, Commander Shangpliang, Section Syiemlieh, Simi Khongthiang aro gipinrangba bak ra·angtokaha.
A·doko jawilwat tarigipa manderangni dingtang dingtang nanganirang aro neng·nikanirangko ma·sie ra·na aro neng·nikanirangko namatna man·na gita ia tom·aniko sorkari ong·atangaha.
Ia tom·anio Information & Public Relations Department-ni Commissioner & Secretary, jawilwat tarigipa manderang baksa chanchirimangengon, jawilwat tarigipa manderangni neng·nikanirangko chel·chakna gita Film Policy-ko tarina tik ka·e donangaha. Ia policy-ara a·doko jawilwat tarigipa manderangna dakchakanirangko on·nasan ong·aigija gipin biaprangoni jawilwat tarigiparangna a·doko jawilwat tarina biaprangko on·e, a·doktangni manderangnaba jawilwatrango kal·na cholrangko on·na miksonganiba ong·enga.
Ia Film Policy-chi a·dokosan ong·aigija national aro international level-rango a·doktangni jawilwatrangko watanichi a·doko film industry-ko tang·doatani cholrangba ong·gen.
Skul aro college-rango Film Club-rangko songanichi manderangna jawilwatni bidingo u·iatani giminba ia tom·anio chanchirimangaha.
Indake ong·engon, Information & Broadcasting Ministry aro gipin ministry-rangni on·enggipa cholrangko ra·e a·doko jawilwat tarianiko tang·doatna man·na gita jawilwat tarigipa manderangko association kulichina gita ia tom·anio Information & Public Relations department-ni Commissioner & Secretary didiangaha.