TURA: State Reservation Policy-ko gital dake nipiltaianio, dingtang dingtang dolrangni aro a·doko songdongenggipa manderangni nangnikani aro chanchianirangkoba ra·engani gimin ia 1972 bilsini State Reservation Policy-ko skango gitan donaichina aro taridapjachina gita Garo Graduates Union (GGU), ia Reservation Policy-ko nipilna gita sorkarini songe on·gipa expert committee-ko didiataha.
Iani bidingo GGU-ni executive committee tom·e chanchirimangenba, May-ni 24 tariko, union-ni nangnikanirangko expert committee-na seachi u·iataha.
A·dokni reservation policy-ko Meghalaya a·dokko man·e on·dilchenggipa pagitcham ma·gitchamrangan a·doko songdongenggipa dingtang dingtang jatrangna bak rengsiko tikatna miksonganiosa tarie on·ahani gimin ia policy ba niamko taridapaniara kraani ong·jawa ine GGU, expert committee-na sedoatgipa chittio janapataha.
“Uni gimin Meghalaya a·doko songdongenggipa dingtang dingtang jatrangni namgnina ia reservation policy-ko taridapjachina aro 1972 bilsio tarigimin niamkon kakket aro bebeo ja·rikchina chinga expert committee-ko didienga,” ine GGU-ni president RG Momin parakataha.
