SHILLONG: Lok Sabha election-o Congress dolni candidate Saleng A Sangma, bang·bea vote-rangchi chee Tura-ni gital MP-na seokako man·ahani gimin da·o ong·atna sienggipa Gambegre Assembly constituency-ni by-election-oba Congress dol chegipa ong·na ka·dongenga.
Tura-ni MP-na seokako man·ahani gimin Gambegre-ni gitcham MLA Saleng A Sangma, biaptangko watna nangahani a·sel da·o Gambegre Assembly by-election-ko jadokni gisepon ong·atpilna nangengachim.
Ia by-election-o susaani bidingo kobor ra·timgiparang baksa agangrikengon, Lok Sabha election-oba Congress dol, bang·bea vote-rangchi Garo Hills-o chegipa ong·na man·ahani gimin Gambegre by-election-oba chegipa ong·gen ine Congress dolni dilgipa Manuel Badwar parakataha.
“Garo Hills-o vote gimikoni tong·sade Congress dolnan re·baaha aro Meghalaya a·dok gimikon Congress dolni vote man·ani ia chang bariangaha. Uni gimin manderang Congress dolko watgalaha ine darangba aganna man·jawa. Gambegre by-election-ko Congress chetelgen ine chinga ka·dongchongmotenga,” ine Badwar aganaha.
Badwar-ni aganani gitade, Tura parliamentary election-o Garo Hills-ni manderang NPP aro TMC-ko jegalenba Congress dolni candidate Saleng Sangma-ko gital MP-na seokaha aro da·o Congress dol bilakbapiltaiengaha.
Da·o dipet Gambegre Assembly by-election-na Congress dolni candidate-ko seokkuja ineba ua parakataha.
Gambegre by-election-na District Congress Committee-ni gita candidate-ko minge on·anggen aro ja·mano state level committee-ni gita candidate-ko nipilanggen ineba Badwar aganaha.
Gambegre by-election-na da·o dipet Congress dolni candidate-ko mingkujaengon, NPP-ni gitade, Chief Minister-ni jikgipa Mehtab Chandee, MDC Rakesh Sangma aro adita sak dilgiparangni bimingko minge donskaengachim.
Gambegre by-election-na TMC-ni gitaba a·dokni gitcham Minister Zenith Sangma-ni jikgipa aro Dengnakpara-ni MDC Sadhiarani M Sangma baksana gipin dilgiparangko mingskaenga.
