Chandrashekhar Vijayashankar, M’laya-ni gital Guv ong·e ku·mikcheta

SHILLONG: Meghalaya a·dokni gital Governor-na songako man·gipa Chandrashekhar H Vijayashankar, Mongolbar salo, Shillong songjinmani Raj Bhavan-o ku·mikchetangaha.
Gital Governor-ni ku·mikchetaniko, Meghalaya High Court-ni Chief Justice S Vaidyanathan dilangskaaha.
Meghalaya a·dokni gital Governor Chandrashekhar H Vijayashankar, 1994 bilsio Karkanata Legislative Assembly-ni membor-na seokako man·ahachim aro 1998 bilsio ua Mysore Lok Sabha constituency-ni MP-na seokako man·skaahachim. 2004 bilsioba ua Mysore Lok Sabha constituency-ni MP-na seokako man·taiaha.
Uni Karnataka a·doko MLA ong·engmiting somoio ua Karnataka sorkarini cabinet minister ong·eba kamko ka·aha aro uandaken ua forest aro small scale industries department-rangko jako ra·e nirokangahachim.
2014 bilsini Lok Sabha election-o ua, ua BJP-ni candidate ong·e Hassan constituency-o a·songni gitcham Prime Minister HD Deve Gowda baksa susaahachim indiba chu·sokgipa ong·na man·jaha.
2017 bilsio Vijayashankar, BJP-oni ong·kate Indian National Congress-o napskaahachim indiba 2019 bilsini November jao ua BJP-o nappiltaiaha.
Ua da·o Meghalaya a·dokni gitcham Governor Phagu Chauhan-ni pal Governor-ni kamko jako ra·angskaaha.
Kamtangko jako ra·na gita ku·mikchetangani ja·man kobor ra·timgiparangna aganprakatengon, a·dokni namroro silroroanina kamko ka·anio ua a·doko songdongenggipa pilak manderang baksa bakrimgen aro gisiko nange kamko ka·gen ine Vijayashankar parakataha.
A·dokna kamko ka·na gita manderangna ku·rachakaniko on·angengon, “Anga kamko ka·anio pilakni nangnikanirangkoba ra·gen. Angni kamko ka·anio anga sorkarini gita aro politics-ni gita ong·gija a·dokni namroro silroroanina gisik on·e kam ka·gen,” ine gital Governor aganaha.
Gital Governor Chandrashekhar H Vijayashankar -ni ku·mikchetanio, Meghalaya a·dokni Chief Minister Conrad K Sangma, cabinet minister-rang aro sorkari official-rangba dongpae bak ra·angaha.