TURA: West Garo Hills a·jani Demdema, Selsella aro Batabari block-ni ning·o donggipa mitam songrango village employment council (VEC)-ko dilenggipa president aro secretary-rang skia pora dongpagijagiparangsa ong·ani gimin dingtang dingtang kamrangko ka·anio neng·nikanirangko chagrongna nangtokenga ine All Meghalaya Minority Students Union (AAMSU) parakatenba, MGNREGA scheme-ni niamrango pangchake, VEC-ni president aro secretary-na election-ko ong·atanio susana gita dongimin niamrangko talate on·china, Community & Rural Development (C&RD)-ni Commissioner & Secretary-na sedoataha.
AMMSU-ni president Md Nur Islam Sk-ni parakatani gitade, badiaba badiaba VEC-ni president aro secretary-rang skia pora donggijagiparangsa ong·e, VEC-ni mobile app-rangkoba jakkalna changjaenga aro uandaken VEC-ni dingtang dingtang kamrangkoba name ka·na changjaenga.
“Mitam VEC-ni president aro secretary-rangde skia pora donggijagiparangsa ong·e, sorkarini kamrangni gimin poraina aro songni manderangna agan-talate on·na man·tokjaenga aro iani a·sel songni manderang neng·nikanirangko chagrongna nangtokenga,” ine AMMSU-ni president parakataha.
Badiaba badiaba VEC-ni president aro secretary-rang skia pora dongjae, Job Card holder-rangni hajirarangko see rakkina man·jaenga ine janapatengon, iani a·selan tangka paisarangko jakkalsretani, kamrangko name chu·sokatgijani aro kamko ka·anio parake dakanirang dongjaenga ine AMMSU parakataha.
Indake ong·engon, VEC-ni president aro secretary-ni kamna poraina aro sena changna nanganiko nangama nangja aro nanggenchimode mai class-ona poraianiko nanga, uarangni bidingo talataniko on·china AMMSU, C&RD department-ni Commissioner & Secretary-ko didiataha.
VEC-ni election-o susana gita gipin nanganirang, jekai bilsi, dongchakram biap, aro uandakgipa nanganirangkoba jinmana talate on·china AMMSU didiataha.
